周一西甲皇馬作客2:1贏咗CF格蘭納達，豪取九連勝兼攞住半邊冠軍盃耳，但係陣中嘅加里夫巴利復賽後一直唔受重用，呢位威爾斯球星繼上仗明目張膽咁喺後備席瞓覺，呢場波佢又玩嘢，就係喺後備席用膠帶扮望遠鏡四圍望，真係唔慌激教練施丹唔死！

聽日31歲嘅巴利唔受施丹重用都唔係咩秘密，上次已經俾外界鬧爆佢冇職業道德同埋白賺人工，巴利一於少理，今仗喺後備席坐足90分鐘嘅佢繼續玩吓嘢，被記者影到佢用膠帶扮望遠鏡四圍望。有傳媒話巴利嘅舉動，係反擊外界上仗質疑佢喺後備席瞓覺，同埋反抗施丹將佢投閒置散。

講番場波，開賽只係10分鐘，皇馬嘅費蘭特文迪喺左路突破殺入禁區射入第一球，六分鐘後賓施馬接應莫迪歷傳送後再入一球，主隊雖然喺下半場初段追番一粒，但都要輸1:2。皇馬喺西甲復賽後連贏九場，喺嚟緊2輪比賽只要攞多2分就可以奪取隊史第34個西甲冠軍！即係周四主場如果贏咗維拉利爾，就唔使理巴塞對奧沙辛拿嘅賽果喇。