金管局退休高管條件咁好，自然大把機構等住請，繼前總裁任志剛「冷河期」一過，即刻俾建行（939）聘做非執行董事之後，交行（3328）行長牛錫明就以25萬人仔年薪，羅致金管局前副總裁蔡耀君呢位福將加盟。
噚日交行宣佈，建議委任金管局前副總裁蔡耀君做獨立非執董。現年56歲嘅蔡耀君，舊年1月退休，一年冷河期過咗無耐，即刻有內銀向佢招手。根據交行通告，如果得到股東同中銀監通過人事任命，蔡耀君就可以正式上任，任期一年。
睇番大家熟識嘅任總就更加勁，2010年8月先出任建行獨立非執董，舊年上任只得5個月，就已經拎咗15.8萬人仔袍金，而且除咗建行，仲兼任瑞銀、德昌電機（179）非執董等多個職銜。雖然身兼多職，但任總之前仲話自己可以hae到，唔知舊副手蔡耀君又可唔可以好似佢咁逍遙？