呢個專欄首次同畢傑合作,佢嘅選擇以世界盃外圍賽為主,而我嘅亦都係一樣。上次國際賽推介德國揩嘢,德軍仲樣衰都輸埋0:1,俾蘋果波神等人恥笑咗幾日,今次死唔信邪,再向德軍埋手。
愛隊德國今晚喺萊比錫對列支敦士登,列支敦士登嘅級數俾佢哋低十幾班有多,場波就肯定贏硬,問題係點贏法同埋贏幾多粒。舊年佢哋作客列支敦士登,輕輕鬆鬆贏6:0,前年主場對另一支弱隊聖馬力諾,咁啱又係贏6:0,所以呢場波點可能開唔到「主其他」波膽呀,2.45倍熱就熱啲,不過應該好穩陣。另外,之前佢哋贏列支敦士登同埋聖馬力諾,半場都係贏1:0,今場波佢哋就算有當「弗」嘅普多斯基同埋馬里奧高美斯撐場,不過最前線冇咗把握力最強嘅高路斯,鋒力多多少少會有啲影響,而且講到近況都只係麻麻,既然係咁就博個[和/主],賠率有6.2倍。