【智取大市】抱炒股不炒市心態作戰（晉佳）
蘋果日報 2019/12/17 15:02
舜宇晉佳美團丘鈦
雖然近日港股大升市，但以炒股不炒市心態作戰更穩陣
港股突然形勢大好，氣氛喺周二中午推上高峯，強勢周期股券商、賭股都炒得有點急，嚟緊氣氛相信會冷靜返啲。
手機設備股同新經濟股輪流炒效應繼續，手機股瑞聲（2018）、丘鈦（1478）之前帶頭急升，升勢周一蔓延到第二梯隊嘅高偉電子（1415）、信利（732）等等。炒到龍尾後，手機設備龍頭逆市腳軟，又到阿里（9988）、美團（3690）接力升。美團才剛剛破旗，以調整浪期間跌幅低加上成交未透支，後市破頂根本冇乜難度。要留意嘅係，美團港股通持股比例喺過去一個星期左右錄得下跌，睇下嚟緊會唔會再有南下資金掃貨，以決定美團中短線股價天花板有幾高。
券商股亦由龍頭炒到龍尾，中信建投（6066）率先起動，一連3日升最多兩成，周一連中信証券（6030）、中國銀河（6881）都大陽燭，然後超級龍尾第一上海（227）周二終於進入升幅榜，呢類A股槓桿股已炒完一個round，要唞唞氣，相信港股快將由全線上升，轉為炒股不炒市嘅狀況，至少用炒股不炒市心態去捕捉升市，平常心一點更容易做到攻守平衡。近期回吐得多嘅李寧（2331）、頤海（1579），相信會有炒作周期股嘅資金回流，呢類高估值內需股估計仍有力返一返高位，能否明顯破頂則有點保留了。