美股投資者已經唔驚通脹，個個睇實啲經濟數據，睇吓啲經濟會差成點，樓價已經跌番好多，要靠層樓去借多啲錢維持生計呢一招已經唔行得通，樓市如果再「冧」，美國嗰邊好多人都唔掂，呢個禮拜會出啲一手樓同二手樓嘅數據，會係美股嘅焦點，啲投資者𠵱家觀望吓先，等啲數據一出，美股應該又會好波動，啲美金已經唔可再以息差嚟炒，隨時會俾人質，到時又可能影響埋美股嘅表現。班大戶好鍾意喺10月玩嘢，無論睇得幾好，都要有兩手準備。
港股昨日早段撲上去17700嗰頭，但係升唔破，嗰個位壓力好大，期指周四結算，淡友唔會咁輕易畀好友過關，要有大動作，睇怕都要靠外圍帶動。

中移動C輪3496：早幾日個市抽上去，全靠隻中移動（941），雖然呢兩日股價喺高位唞唞，但係啲交投仲係好暢旺，技術走勢仲係好強，估計班好友仲係以中移動做重心股份，個市挾上去，唔少得中移動嗰份，58至60元，應該係短線嘅目標。
隻中移動C輪3496昨日報收29.5仙，溢價13.2%，仲有5個月期，槓桿率18.9倍（有效7.8倍），引伸波幅30.3%，由低位上番，應該愈嚟愈多人留意。正股升上58元，3496可以升上40仙，正股上試60元，隻C輪會上試50仙。正股嘅裂口支持底部喺54.30元，跌穿呢個位先行沽出止蝕，正股升到58元如果有太大沽壓，可以沽出獲利先。
俊樺