美股上周五下挫，加埋人行周六又加存款準備金率，本來今日開市港股有幾危，散戶都預咗。喺網上討論區，華華就見到唔少網友話今日係「黑色星期一」。不過，最令散戶不安嘅，原來唔止呢兩件「大嘢」，而係「秋官效應」，而且今趟秋官仲同埋阿女欣宜大小丁蟹一齊出嚟。
話說星期六晚，秋官偕女欣宜出席《歡樂今宵團圓夜》，仲合唱咗首《天涯孤客》。sinoland睇完之後有感而發，將首歌部份歌詞改為：「日又輸光、夜又輸光，日又輸光、夜又輸光。夜靜DowJones跌到謝，你我空觀望，何堪股民明天將來何以靠岸？」
rohmot建議「沽貨離場。」cheungcm就話：「可能負負得正呢！」tonycf無奈問：「點解咁啱？美市大插加大陸加存款準備金率，唔死？再放大小丁蟹兩隻，冒求一Q清袋。」karce話：「父女合作，（散戶）必有傷亡。」金錢的奴隸：「雪上加霜的威力。」咁威力有幾大？楊汀估：「星期一唔跌1000至1500點，點對得住我淡友──楊汀（蟹）。」kwaip24更話：「兩個加埋跌2000點冇走雞。」

專家：或拖累後市

與其靠估，華華直接問專家，新鴻基金融策略師彭偉新話：「上個禮拜五美股下挫兩百幾點，按跌幅估計，港股今日有機會裂口低開四百幾點，𠵱家美國經濟數據差，內地嘅宏調措施仲未完，外圍資金流入香港減少咗，如果今日港股成交唔多，恒指唔能夠企穩喺28400點嘅支持位，後市可能會下調至27000點水平。」
豐盛融資董事黃國英就話：「今日港股走勢好關鍵，預計恒指會先低後高，有機會一開市下挫八九百點，跌破28000點，午市後會回上，但如果恒指企唔穩喺28300點水平，會影響投資者信心，拖累後市。」

大陸股民最怕的日子

港股曾經歷過唔少「黑色星期一」，而且次次都係受到美股周五暴跌拖累。唔講咁遠，就喺上個月22號星期一，恒指受美股急跌拖累，勁插近1100點，係自2000年4月科網股爆煲以嚟最大跌幅，港股市值單日蒸發7400億銀，雖然之後嗰日，恒指「DeepV」大反彈，收復失地，但咁樣嚇法，都咪話唔驚。
另一次更慘烈嘅「黑色星期一」，首推2000年科網泡沫爆破，當年4月17號，恒指跟隨美股跌1380點，跌幅達8.6%。
咪以為「黑色星期一」係「外國貨」，大陸股民聽到「黑色星期一」一樣怕。今年6月4號（星期一），大陸就曾經上演過一幕驚心動魄嘅「黑色星期一」。官方財經報章批評股市「非理性繁榮」，引發大陸散戶恐慌性拋售，上海Ａ股當日急插8.26%，達346點。

來源自87股災

「黑色星期五」大家聽得多，即係碰正13號嘅星期五，至於「黑色星期一」，唔係解13號嘅星期一，佢嘅來源其實係嚟自20年前、1987年嘅美國10月股災。
話說當年10月19號星期一，由於程式交易引發大量沽盤，道瓊斯指數狂瀉508點，跌幅達22.6%，係美股歷年來最大嘅單日跌幅，拖累道指市值一日間蒸發5000億美元，更觸發全球股災。
當時香港聯交所主席李福兆要走出嚟，破天荒宣佈停市4日，不過，10月26號復市，咁啱又係星期一，恒指一開就急跌，全日重挫1120點，跌幅達三成三，跌得仲甘過美股。
電郵：mailto:[email protected]