小妹噚日去皇后大道西搵老牌燈籠生產商天就行採購部嘅經理老友伍淑芳，見到成條街啲舖頭都掛滿燈籠，幾好氣氛。天就行年年中秋都搞吓新意思，自行設計生產新款燈籠，保持新鮮感喎，今個中秋推燈籠三寶：龜仔、海豚、泡泡魚。
淑芳姐話，今年向難度挑戰，推出歷年最難做嘅全新Q版長壽龜布燈籠，單就構思設計花咗三、四個月時間，長壽龜唔單止龜首龜尾會郁，連四肢都可以郁，龜身圓點紋，龜背有個大金錢，「做咁多年燈籠，呢款最難，之前啲燈籠只有一個組件，呢隻龜燈籠頭、手、身等共七個組件，工序繁複，成本比一般燈籠高25%至30%。做得咁辛苦，好在反應唔錯」。龜燈籠Size由6吋至20吋不等，賣$38至$480，有紅、黃、紅黑等七種顏色選擇。

成本上升約加價一成

淑芳姐又話，因應顧客不斷要求，今次設計咗一款活潑可愛嘅海豚燈籠，外形好似跳出水面咁；一款Q版泡泡魚，靈感嚟自雞泡魚，肥嘟嘟，兩隻眼凸出，好鬼得意，首次用咗紗布料，增加透明度。兩款燈籠賣價$25至$380。
另有兩款重新設計嘅變種精品蜜蜂同蝴蝶，「以前啲客多數買蝴蝶燈籠，覺得蝴蝶顏色靚啲；我哋今次同蜜蜂平反，設計一對雙層雙色翅膀；而新款蝴蝶燈籠，翅膀底面都有蝶紋」。淑芳姐話，今年燈籠巿道唔錯，批發量家去咗八成貨，比舊年同期多一成，今年燈籠成本上升一成，零售價加番8至10%。

電郵：mailto:[email protected]