當年今日

MV抄人唔使本 辣㷫派拉蒙
籮霸倒模《勁舞》賠硬!

蘋果日報 2003/05/07 00:00


我羅拉早排都同大家講過,籮霸珍妮花洛庇絲(JenniferLopez)嘅最新MV《I'mGlad》擺明老翻八三年由珍妮花貝斯(JenniferBeals)主演嗰套勁hit電影《勁舞》,話口未完,投資《勁舞》嘅派拉蒙電影公司,原來已經去信籮霸所屬嘅Sony唱片公司告佢哋侵權,認真濕滯!
籮霸喺《I'mGlad》MV入面,無論造型同舞蹈編排統統都抄足《勁舞》,爆炸頭、跌膊衫加legwarmers,簡直係倒模咁倒。之但係籮霸又唔喺個MV入面畀番credit人哋,難怪派拉蒙會發火啦!最慘嘅係個MV已經出晒街,正所謂覆水難收,Sony明知自己理虧,咁梗係要焗住賠錢啦!不過派拉蒙話籮霸抄到咁似,不如開番套續集扮到夠喎,如果真係成事嘅話,認真係因禍得福。

買香水倒自己米
講開又講,籮霸早兩日俾人見到喺紐約Soho區狂掃香水,有人話佢買咗成萬蚊港紙嘅JoMalone香水返屋企。咁又奇喇,籮霸唔係擁有自己品牌「J.Lo」嘅香水咩?咁搞法即係分明倒自己米啫!