龔耀輝Ronald四年前落選會計界，前年出戰選委會，又跟錯「大佬」抱憾，今年捲土重來，盡地一煲show埋《信報》財經專欄筆名「方卓如」做王牌，一般人認為佢選情備受睇好，據講公民黨譚香文已經唔係佢對手，如果可以片低中聯辦力撐嘅陳茂波，真係臨尾一鋪贏凸。

首次企街派傳單

為催谷選情，方卓如終於出動終極撒手鐧，噚日搵筆名原復生，又名孔少林嘅蔡東豪為佢站台。方卓如拍住孔少林企喺中環街頭可能係第一次，不過佢哋好斯文，冇話自己就係原復生同方卓如，咁搞法，其實同搵個無名氏站台差唔多。呢次係原復生處女下海為人拉票，顯得有啲生疏，亦有啲怕醜，只係企喺度派傳單，並冇嗌咪。
原復生唔係會計界選民，但有安排方卓如到自己公司拉票，雖然成間公司只得五票咁大把。方卓如甘之如飴，話自己差少少就贏硬，所以呢五票都十分重要。至於原復生，佢一家三口喺港島區有三票，不過仍然未決定投票畀邊一個。原復生以前寫文讚揚敢於公開表達政治立場嘅上市公司高層，輪到自己企出嚟，唔知有乜滋味。