香港人經歷咗風雨飄搖、受盡打壓嘅一年，美國噚日終於宣佈制裁包括林鄭等在內嘅11名高官，惹嚟全城慶賀。但美國嘅制裁名單一出，唔少網民都不滿太多人未上榜，但估唔到連新民黨嘅李梓敬都喺facebook公然篤灰，問「點解無張建宗？」似乎佢都唔係好滿意張List喎。

11名被制裁中港官員名單按此

噚晚雖然好多人都話開心到訓唔着，但有網民就嫌美國張制裁名單太短，好似姐姐葉劉、前特首689等都統統無影，唔夠過癮咁喎。愛facebook不愛微博嘅689，已經率先喺名單公佈無耐出嚟「刷存在感」，不滿名單太短之餘，仲講咗句「What a joke!」似乎唔係好滿意自己被無視，唔喺名單之列，自嘲話可能因為自己唔夠愛國。然後689仲要嘲笑美國出嘅名單，寫錯咗林鄭住址係政務司司長官邸，「堂堂超級大國，竟然犯這種低級錯誤」。

689咁嘅反應，正如羅冠聰話齋，「梁姓國家領導人係咪唔知制裁會有第二、第三輪㗎？講真你喺條名單上都一定排到好前吓。」

唔滿意嘅原來仲有人稱「西門梓」嘅新民黨李梓敬。噚晚11點，佢竟然喺自己個有「大嗱嗱」4.8萬個Like嘅facebook專頁度「篤灰」，問美國制裁名單「點解冇張建宗？」呢番言論隨即惹嚟譁然，仲有成700個人畀笑哈哈，有藍絲附和留言質疑張建宗係「鬼」，但亦有網民好擔心李梓敬，話佢要求外國制裁港官員，其實已經犯咗《國安法》。

智庫研究員馮智政仲直頭Cap埋圖恥笑「西門梓」，篤返佢灰話佢已經犯咗《國安法》第廿九條四，請求外國制裁，「對香港特別行政區或者中華人民共和國進行制裁、封鎖或者採取其他敵對行動」。

其實張建宗喺過去一年除咗幫佢老闆「執手尾」，仲畀「林大總統」警察隊員佐級協會主席林志偉迫道歉，而家連「西門梓」都要篤佢灰，四面受敵，唔怪得佢頭上嘅煩惱絲好似越嚟越少啦！

「衝出嚟」嘅仲有「戰狼」何君堯，佢貼咗幅類似新聞報道嘅簡體字截圖，內容係「重磅：特朗普或下令禁止地球轉動」，跟住仲話「侵侵要讓尾國再次強大﹗(網絡訊息，應是堅料，除非唔係﹗)」乜回應得咁無力㗎，唔通驚咗？

講到驚，有幾位平時好勇嘅「戰狼」就笠晒水，譬如連亞博有張自由神像相都用嚟開醫管局拖嘅民建聯葛珮帆，寧願po自己派口罩都唔撐被制裁官員；出手拖行人民力量陳志全唔道歉、仲要出言不遜嘅「暴徒先生」工聯會郭偉強，佢哋嘅fb都係隻字不提制裁。唔使驚喎，中聯辦都出咗聲喇，講得㗎喇，快啲講啦。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新