久未露面嘅前新聞統籌專員馮煒光，自從離開政府熱廚房後，今午同傳媒聚會，大家難免問佢點睇，政界流傳前特首梁振英將再參選特首嘅傳聞，任內同689關係密切嘅馮煒光話：「我就唔多信嘞」，透露自己現時做緊財經公關，做得好開心，無打算重返政府，明年初仲打算搞一個畀大學生參與、有關喺中國內蒙古庫布其沙漠創業嘅比賽。至於點睇廉署就UGL案不控告689後，佢一直拒公開評論呢？馮煒光就話覺得「好正常」，佢自己都唔多想評論，因為相信坊間已有好多人會評論呢件事喎。

今日聚會上唔多談論政事嘅馮煒光，主要分享佢最近最愛嘅航拍嗜好，仲向傳媒派發佢印咗300幾本，用佢航拍作品做主題嘅月曆。馮煒光話，其實航拍呢個嗜好，都係689引領佢愛上嘅，事緣當年689對由科大生創辦嘅「大疆創新（DJI）」航拍機有興趣，叫佢可以了解多啲，佢一接觸後，就從此愛上，自此去過好多地方航拍，包括北京、西藏、馬爾代夫同新疆。問佢最驚險嘅航拍經歷，馮煒光話，係早前去珠穆朗瑪峰大本營航拍時，一度遭武警話因為該處位處邊境，所以唔拍得，要求佢刪走好多張相，但就容許佢留返西藏絨布寺影嘅靚相，成為佢今次月曆其中一張作品。