【何韻詩做導演】相隔12年再合作 周國賢:佢緊張我仲多過自己
演唱會何韻詩周國賢麥花臣場館
周國賢(Endy)一連三場演唱會噚晚係麥花臣場館開鑼,台前一幅大型布幕,顯示一條銀河,佢喺演唱會自彈自唱咗好多首歌,而且仲同企位嘅觀眾握手,之後Endy又着咗一件魚網衫出場,搞到啲觀眾喺度咿嘩鬼叫。佢又喺台上話將自己喺呢3、4年嘅經歷擺咗喺個騷裡面,希望大家能夠好好感受!
Encore位,Endy向導演何韻詩致謝,完場之後,粉絲不停叫Encore,好多都唔肯走。騷後Endy接受訪問,講到喺中段唱到聲沙沙,佢話:「枕頭搞到我條頸郁唔到,要針灸,啱啱先好,綵排嗰時以為冇事,冇錫住把聲,點知唱到一半就有少少攰。之後早啲瞓應該冇嘢。」
台下粉絲喺佢致謝時,為佢唱生日歌,但係佢戴住耳機,所以聽唔到:「我成年到o依家,第一年冇飲酒慶祝生日。」佢話今年佢食咗好多個蛋糕,所以影響聲線:「好驚西藥,我連止痛藥都唔食,次次食西藥都頭痛。」Endy希望自己之後兩場表現可以更好:「第一場好多蝦碌嘢,唔好意思。」唱最後一首《在天之靈》嗰時甩嘴?佢話:「因為好亂,耳機有十幾個人把聲,聽日我會拎走佢。」
今次同何韻詩合作,Endy話勾起12年前,做舞台劇《梁祝》嘅回憶:「12年來大家睇住大家,我休息過一排,中間好多時佢都好扶持我。今次我完全唔覺得佢係一個歌手,真係一個好專業嘅導演,佢緊張我仲多過自己,每日都講歌詞同燈光要點。」
更多娛聞,喺晒《娛果》
http://fb.com/appledailyent