政府推行教改要求學生「樂善勇敢」，所以教育界近年大搞通識教育，有個家長向八方報料，指佢細路就讀嘅灣仔堅尼地道聖公會聖雅各小學上午校，小學五年班通識科測驗好出位，有條多項選擇題挑戰政治尺度，佢自認個細路資質一般唔識答，連佢都難以抉擇。

問程翔犯何罪入獄

八方睇過呢份小學測驗卷，發現果然唔簡單，其中一條問題問：「資深新聞工作者程翔究竟犯了甚麼罪，給中國政府判入獄呢？」測驗卷提供三個答案選擇，分別係A.行騙罪、B.賣國罪、C.間諜罪。據該位苦惱家長講，如果按中國官方口徑，答案應該係C，不過一國兩制，特區政府好似冇為程翔案定性，唔知教育局有冇標準答案，揀邊個先啱？
《蘋果》一向讀者至上，八方為讀者解決問題責無旁貸，要回答呢條問題，相信冇第二個人夠程翔權威，八方問佢應該揀邊個答案，程翔指校方提供三個答案都唔啱，如果要佢參加測驗，佢都揀唔落手，除非加多一個選擇D.寃假錯案。
中國法律問題專家王友金知道小五測驗卷有呢條題目反應好大，佢指若果跟從內地審判結果，唔使諗就揀C.間諜罪啦。不過程翔案唔簡單，要獨立思考當中問題，若從法律角度睇，呢單案完全判錯罪，因為指控程翔犯間諜罪，但卻無充份證據，案件根本唔成立，何來犯法判刑呢？所以三個答案都唔啱，應該重出測驗卷！

校長稱冇政治取向

聖雅各小學上午校校長張勇邦話，「程翔何罪」呢條問題，相信係老師參考新聞而定，學生有留意時事嘅話應該識答。張校長話對程翔案冇立場，測驗卷答案根據報章資料而定，冇政治取向，佢又指MC題目多元化，其他涉及時事題目包括淫照風波、經濟學家林毅夫出任世銀行長等，都唔係政治性問題。
國情話變就變，程翔隨時可以翻案，八方建議校方畀多個「以上皆不是」選擇，或者同學生討論案件，訓練佢哋獨立思考，如果只按中共官方講法提供答案，令小學生認定程翔有罪，可能變相同學生政治洗腦而不自知。
mailto:[email protected]