衞冕的FC廣州（恒大）陷出局邊緣！周二亞冠盃H組，恒大作客以0:1不敵浦和紅鑽，續排包尾，就算餘下兩戰全勝，也未必能晉級。
紅鑽上半場佔逾六成控球，圍攻恒大，而恒大只有零星的反擊。37分鐘，恒大右路傳中，紅鑽解圍不遠，遠柱的列卡度高拉特第一時間勁射，省到對方後衞出界。45分鐘，紅鑽禁區頂獲得罰球，柏木陽介射斜，半場互交白卷。

保連奴中柱失黃金機會

47分鐘，恒大有次黃金機會，張琳芃右路傳中，高拉特後腳接應，傳予荷西保連奴抽射卻射中柱。52分鐘，關根貴大傳中，宇賀神友彌射門，武藤雄樹門前再加多頭，為紅鑽開紀錄。之後紅鑽改打穩守突擊，恒大進攻老鼠拉龜，紅鑽的反擊更具威脅。80分鐘，關根貴大門前近射，曾誠雖然失位，但用腳擋出。一分鐘後，興梠慎三單刀埋門，又被曾誠救到。最終紅鑽主場小勝1:0。
同組另一場，FC悉尼主場贏浦項制鐵1:0，以九分排H組榜首，紅鑽以七分緊隨其後，制鐵仍得四分，而恒大續以兩分包尾。就算恒大餘下兩場全勝，也要寄望紅鑽兩戰全敗，才能有機會打入16強。文：咖喱