噚日朝港股先升後急跌，中午前突然回升，下午大反彈。除咗外圍市況好番啲之外，摩笛唱好係另一個原因，對近日港股可謂及時雨。
大摩昨日發表報告，將港股評級展望由「審慎」調高至「與大巿同步」，料恒指今年底可見30000點，建議買入估值吸引、受惠於美國減息，以及受美國衰退影響有限的股份。呢份報告老實講，其實唔算唱得好好，因為30000點一來唔高，比現在只係多5000點而已，二來係年底目標，港股幾日內都可以跌3000幾點，成年時間可以發生好多事。
相比起恒指目標，其揀股貼士更為重要，簡而言之就係估值唔高嘅本地銀行地產股，但何謂估值吸引？以PE計本地地產股不算便宜，不過以每股NAV計，部份卻仍有升值空間，要點計真係要等大行報告詳細分析。

至於銀行股，唔少中小型銀行估值仍偏低卻係事實，例如曾獲陸東點評嘅大新金融（440），只係11倍PE，喺來年息口低企，貸款尤其樓按需求強勁情況下，仍然抵買。大銀行方面，恒生（011）同東亞（023）都係19倍左右，前者有本地龐大分行網絡優勢，後者則有內地業務支持，若以賬面值或P/B比較，則恒生係6.3倍，而東亞只係2.6倍，明顯東亞抵好多，況且中銀香港（2388）早前才以51元入股東亞，現價低逾一成，根據大摩揀股原則，買得過。

至於乜股短期買唔過，應該係年初炒過一浸嘅內需股，尤其係食品加工股，中央剛宣佈實施糧食價格管制，為15年來首次，豬肉、雞肉等主要糧食都唔使旨意加價，搞到統一企業（220）勁跌12%、蒙牛（2319）跌逾8%、康師傅（322）跌逾7%，雨潤（1068）都一度跌6%，收市跌1.8%，惟過去一個月已經跌咗3蚊以上。春節前睇怕食物都幾難加價，春節後仲未知，要博反彈都唔係呢個時候。