何超盈、貝安琪同未婚夫Simon、媽咪劉香萍同薛芷倫等，噚晚去咗洪永時老婆Deborah喺銅鑼灣搞嘅Halloween Party，佢哋都好花心思化骷髗頭裝。超盈為咗參與呢次活動，化咗半邊面骷髗頭裝，仲加咗紫色嘅駁髮襯長褲。

忙住開工嘅超盈，好耐都冇參加過party，佢噚晚心情勁靚，佢話：「用咗2個鐘去化裝，扮靚真係要花好多時間，平時返工冇可能整顏色駁髮。」講到工作方面，佢話嚟緊會贊助湯漢斯(Tom Hanks)主演嘅電影《地獄解碼》（Inferno）首映禮：「想進軍文化業，會盡力去做推廣，o依家英國、香港兩邊飛，下個禮拜又要飛歐洲。」

早排四太梁安琪豪掟13億買山頂豪宅送畀囡囡超盈、超欣學投資，問到超盈係咪好驚喜？佢話之前已經知，咁會唔會將單位放租？佢笑話：「其實媽咪至係最終話事人。」

而個肚好似籮咁大嘅貝安琪就着住4吋高踭鞋，都化咗骷髗頭裝，佢話個B陀得好好，日日都有做瑜伽同伸展運動，BB性別同預產期想要保持神秘。佢連婚禮幾時舉行都要懶神秘唔肯講。

至於搞手Deborah一樣係骷髗頭裝扮，嚟自墨西哥嘅佢話：「我很喜歡舉辦派對，每年聖誕、生日或萬聖節，也會辦不同的主題派對，今年以墨西哥節目做主題，10月開始籌備，我這個裝扮花了40分鐘便完成。」