特區政府動用八億公帑推「銅芯抗疫口罩」（CuMask），不過好多高官都冇用，雖則特區之首林鄭月娥見親佢都有戴，但俾網民質疑佢唔識點戴啱個口罩，話口未完噚日又出事。777噚日現身行政會議前記招時，除咗一如所料喺冇睇過「港版國安法」條文下繼續盲撐立法外，講到政府保就業「功績」時，突然一邊扯面上嘅CuMask，一邊「爆肚」：「今日個口罩麻麻哋，唔知點解，可能洗得多，鬆咗。」

被問限聚令疑扮儍

其實777噚日頻跌口罩，露出半個鼻頭，都唔係新鮮事。之前民政事務局局長徐英偉戴住CuMask開記招，已經多次「離晒罩」，個口罩不停滑落，要佢不停用手觸碰口罩表面調整位置，最後更索性全程用手扶着口罩，以免滑落，已經知呢個八億口罩根本唔好用，𠵱家連特首都要公開踩呢個被網民諷為「底褲口罩」麻麻哋，唔知過去一直硬銷呢個口罩嘅創科局有乜感受？

除咗踩政府口罩唔掂，777噚日畀傳媒問到限聚令係咪今年7月1日前都不會取消時，佢忽然疑似扮儍，突然問喺佢身邊主持記者會嘅特首辦助理處長（傳媒）姚繼卓：「限聚令有效期應該到7月2號，係咪啊？你都唔記得？」睇落似乎7月1日前，大家都唔使旨意政府會取消警方頻頻用嚟阻止巿民集會遊行嘅「限聚令」。

李八方