土耳其周五轉會窗先至關閉，唔少球隊都盡最後努力搶軍，好似傳統班霸加拉塔沙雷，原本同西甲嘅巴塞隆拿傾好晒，借用土耳其國腳阿達杜倫2年，不過交易最終告吹，原因係阿達杜倫想留喺巴塞。

30歲嘅阿達杜倫喺2004年開始為加拉塔沙雷上陣，之後轉投西甲馬德里體育會，2015年更轉投巴塞隆拿，但近年飽受傷患，同巴塞亦格格不入，上陣機會極少。加軍原本希望帶阿達杜倫重返土耳其，但佢堅持唔離開，加軍都冇辦法。