當年今日
關於我們

【古仔升影帝後】唔愁機會只怕加價 杜Sir爆:有啲人會扮嘢㗎嘛

蘋果日報 2018/04/21 21:04

鮮浪潮古天樂惠英紅杜琪峯

問會唔會希望同古仔多啲合作,杜Sir話:「大把機會啦,我哋樓上樓下,成日都撞到,但合作要度到先至得,佢又咁衰o依家攞到影帝,都唔知會唔會加價,有啲人會扮嘢㗎嘛!」問佢係咪想講古仔扮嘢?杜Sir話:「唔係,係佢想扮唔識扮囉。」
係咪恭喜古仔攞咗影帝?杜Sir笑笑口話:「恭喜佢呀?點都要講嘅,唔鍾意都要講,人哋攞咗呀,吹咩?好與唔好都各有各講法,不過佢對香港電影真係好大貢獻,出錢出力,亦照顧好多年青導演。」
活動上杜Sir叫古仔做「古趣趣」,杜Sir解釋稱:「佢個人咁有趣,又多嘢做,人見人愛,車見車載,咪叫古趣趣囉。」聽日杜Sir生日有乜慶祝活動?佢話:「冇乜特別,都係咁啦,未死得住,順其自然。飯日日都要食啦!(開party?)人多嘅地方就係party啦!」
至於古仔話攞獎之後一路要開工冇慶祝,聽日又要飛上海做品牌宣傳。提到佢同惠英紅曾經喺無綫劇《創世紀》合作過,兩人話未試過合演電影,希望遲啲有機會。問古仔同小紅姐有冇興趣做導演?古仔話:「暫時都冇咁嘅諗法,除非唔做演員,因為自己要放低演員身份,做導演要好專心。」小紅姐就稱:「自己曾經做過副導做過製片又做過監製,曾經有人邀請我做導演,做導演係一件好大壓力嘅事,同埋一定要放低幕前嘅工作,自己目前為止仍然好熱愛幕前工作,未enjoy到做導演嘅工作。」
精選娛聞,喺晒《娛果》
http://fb.com/appledailyent