地產多聲道:金牌代理董事級收入

蘋果日報 2004/07/05 00:00


近一兩個月樓市偏淡,但總結上半年,地產代理業仍然大豐收。美記初步統計,上半年有過百代理月入逾十萬。其中營業員有四十多名,主管級或以上重多,超過六十個。
最佳營業員係香港舖位部梁國文,為公司做咗佣金收入逾千五萬,今年最大宗舖位買賣,價值四億嘅旺角電腦中心,就係佢同上司盧展豪一齊促成。梁國文重連續兩年攞到最佳營業員獎。
美記引述政府統計數字,金融、保險、地產及商用服務業員工,月薪近一萬零五百,足見呢班金牌代理月入認真令人羨慕,相信等於中型公司董事級月薪。
講開舖位,剛收到料,美記鄺鋩,日前半個鐘內做成尖東半島中心三十五號舖買賣,作價七百八萬,破咗公司最快紀錄。

屋苑網站日見普及
電腦使用日漸普及,好多公司都設立網站,方便同客戶接觸聯繫,原來唔少物業管理公司,都為負責屋苑開網站,聽講有啲係按業主要求。
有啲屋苑喺招標管理合約時,列明為屋苑設立網站,係條件之一。
聽講,為屋苑開網站,最多係富城,過百個,其中五十八個屋苑網站,重攞到「無障礙優異網站」第一級大獎。
屋苑網有唔少嘢睇,例如業主之間對物業設施反映,單位間隔建議、裝修等。
租貴迫人買舖
零售興盛,商戶生意大增,業主順勢加租,近期租金升幅凌厲。為免受加租之苦,賺埋唔夠畀業主,部份商戶索性自置物業,一勞永逸。
中原顏劍青話,一名十多年未有沾手舖位買賣嘅餐飲業商戶,最近出手買舖,擴充業務,用千六萬購入荃灣富麗花園商場二樓兩萬呎,計劃開設中高檔特色食肆。個舖原本係戲院,現在交吉。
舖租急升,估唔到間接推動買賣。

奧海城免費教打拳
今時今日經營商場唔容易,過時過節例牌要大事裝飾、搞活動與送優惠吸引消費者,而且活動唔再局限請明星藝人表演咁簡單。
信和大角嘴奧海城「運動基地」,就搞搞新意思,面對家長心態,本月十八之前,喺商場內購物消費滿指定金額,可以幫小朋友報讀免費課程。
課程分劍擊、足球同詠春,上課地點喺商場內,等小朋友唔使日曬雨淋,重可以過一個有益身心嘅暑假。課程歡迎家長一齊報讀。
另迎接奧運來臨,奧海城二期商場,擺放一個高十五呎,直徑十呎嘅「巨蛋倒數時計」。
蘭西
電郵地址:[email protected]
empty
鄧成波四億沽旺角電腦中心商場,係由美記促成。
empty
富城管理嘅屋苑,逾百個設有網站,部份重攞獎㖭。
empty
喺奧海城購物,有機會免費報讀劍擊、足球及詠春課程。大人同小朋友齊齊上課,可以加強親子關係。