疫情持續，政府宣佈將關閉多個處所，包括健身中心、美容院及按摩院等，周四凌晨實施。有健身業界怒轟，業界已做足防疫措施，除課堂人數控制，其經營的中心掛滿膠膜分隔，「全個中心好似倩女幽魂咁」，斥各行各業成為政府防疫不力的代罪羔羊，形容所經營的健身中心如生命一切，即使月蝕10萬也要拼命維持下去。有按摩業直指現時停業即是「白交租」，不望政府補貼，但望可以開門做生意。

健身搏擊運動業界大聯盟召集人柯尊鼎說，雖然「預咗」政府會勒令健身中心等停業，但今次已是第三度停業，將大力打擊整個行業，「交12個月租，開得8個月工，但真係有收入、比較正常收入嘅只得兩、三個月。唉，我諗大家幾有鬥志都好，都變得好灰心、好死心，因為睇到呢個政府由頭到尾，次次都美其名話防疫去做嘢要我哋或其他行業去停，但其實我哋只不過係代罪羔羊，係佢哋政治目的產生嘅防疫問題，又要我哋去承擔」，批評政府未搞好封關，又讓免檢疫人士來港，令各行各業處於寒冬。

柯尊鼎說，自夏季第二次停業後，因已過旺季，業界要重回正軌已十分困難，以自己經營的泰拳健身中心為例，至10月左右漸漸穩定，惟上月即爆疫情，生意僅得平日的三至四成，「學生唔續堂、觀望（態度）呀」，擔心現時年底再停業，生存空間更細，「可唔可以翻身都成問題」。

柯又表示，過去兩次停業政府向業界發放10萬及5萬元津貼根本不足夠，而第二次停業的5萬元賠償，至今更是「一間中心都未收到」，現時又來第三次停業，「第一次（10萬）已係極度唔夠、第二次佢減半、第三次你覺得佢會有幾多呢？我哋業界無諗住乞求香港政府嗰啲賠償，我哋只係希望有生存空間，可以自食其力，畀我哋繼續營運」。

他說，業界已做足防疫措施，除課堂人數控制，其經營的中心掛滿膠膜分隔，「全個中心好似倩女幽魂咁，連個擂台都間開晒、一個沙包之間都隔開。做咁多都係想更有效防疫，想學生安心，至少可以交到租，但政府連呢個機會都唔畀我哋」。

他指，現時所經營的中心月蝕10萬元，若疫情持續，仍難以吸引學生，強調不少中小型健身中心經營者不是投資者，「我哋嘅中心係生命嘅一切，就好似仔女一樣，會盡力點都捱住佢，因為佢係我哋嘅所有。」

按摩業總會主席周鎮宇說，業界自疫情後已按規定，只接已預約客人，「booking都爆嘅」，雖然每逢節日前後是業界的旺季，亦受制於預約客人人數有限，目前生意僅僅夠維持生計，停業即是「白交租」，小型按摩院恐因此倒閉，較大間的按摩院不少是售賣預售套票，若捱不住租金要結業，也要將套票款項退錢，如無法退款將是另一大問題，按摩院陷入進退兩難。

周續指，行內有不少是自僱按摩師，可能同一時間為數間按摩院工作，今次停業，自僱按摩師首當其衝「手停口停」。對於政府說會向受影響業界提供支援，他則指，不望政府補貼，但望可以開門做生意。

美容健體專業人員總會主席許慧鳳說，雖然對政府決定感無奈，但理解這是為了抗疫。她指，業界今年內先後停業共約兩個月，早前復業後生意只回復5至7成，因仍有客人感到擔心，「最主要有啲客人開咗包月（套票），會盡量嚟做。但如果單次性（付費）嘅客都會睇（疫情）」。

許續指，政府要求停業略急，「想話做埋個小周末都唔得」，自去年社會運動已影響聖誕節生意，今年則是疫情拖累，主動聯絡客人做美容，客人也因疫情避免外出，「最擔心係疫情唔知拖到幾時，即係你成日要業界點樣配合，好難囉。同埋客人一個月、兩個月唔嚟，生意係影響好大」。她指，盼美甲業可獲放寬，業界亦會再政府商討補助。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！