噚日紅十字會周年大會好似變咗李氏三母子做騷大會,首先80幾歲嘅李福樹夫人同個仔李國寶,就因為分別服務咗紅十字會45同20年,獲頒長期服務獎,至於寶哥哥個躁狂細佬教育統籌局局長李國章雖然冇獎攞,但亦都現身祝賀兩位親人。
阿瑟王好孝順,李福樹夫人嚟到後,阿瑟王就照顧聽覺有問題嘅阿媽,猛響阿媽耳邊講嘢,之後寶哥哥到場,就係咁同細佬密斟,及至李老夫人獲紅十字會主席楊鐵樑爵士頒獎,兩個仔都係咁錫阿媽面珠登,好鬼興奮。
大會完畢後,李氏三母子前後腳走。李國章一馬當先大踏步離開,唔畀機會記者。被兩個仔撇低嘅李老太唔知真係耳仔有問題,抑或借咗聾耳陳隻耳,連記者問佢攞獎感受都冇理到。不過,八方要喺度同企足全場照顧李老太嘅菲傭Cathy伸吓寃,好心下次畀張櫈佢坐,因為咁會人道啲。