為咗繼續扮工將香港表面上重回正軌，777懶理未來經濟下行要積穀防饑，呢個星期豪使納稅人成百億想再用嚟收買人心，其中將「2元乘車優惠」放寬到去60歲，就係用市民血汗錢補貼「中年人」坐車，難為777仲厚顏話呢樣係政府嘅最大德政，但唔知大家仲記唔記得，呢個政策其實嚟自前前任特首曾蔭權任內最後嗰份《施政報告》，事隔九年兩屆政府仲食緊呢樣老本，恐怕反映緊呢兩屆政府真係好無能。

有利益衝突之嫌

無啦啦60歲或以上可以2蚊坐車坐船坐鐵路，老友就提醒八方，行會裏面都突然多咗班直接受益者，八方睇過行會名單，原來成個問責團隊係最大受益集團，總共有九個人因為咁可以平坐公共交通工具，除咗777自己，財爺陳茂波、律政司司長鄭若驊、公務員事務局局長羅智光、食物及衞生局局長陳肇始、民政事務局局長劉江華、保安局局長李家超、運輸及房屋局局長陳帆同創新及科技局局長楊偉雄都榜上有名，反而非官守議員中就只得廖長江一個係介乎60至65歲，其他唔少甚至係七十古稀以上，難怪佢哋對青年人嘅政策同睇法咁離地啦！

上至特首下至問責官員公佈嘅政策，如果佢哋係直接受益人，八方記得呢一種好似係叫利益衝突，雖然只係涉及2蚊雞，呢班達官貴人亦未必會享用優惠，但數還數、路還路，唔知成單嘢有冇去行會?佢哋喺行會討論嗰陣有冇申報利益?甚至作出避席呢？八方聽聞有同事向特首辦作出咗查詢，但到截稿暫時未有回覆囉。

李八方