在職場上打滾，OT、甚至有開工無收工，很多時已經看在人工份上豁了出去。但問題往往並不是做得多與少；辛苦與不辛苦，而是「條氣順唔順」。今日半宅職薯想為各位職場小薯發一發聲，回應五句最常見來自上司口中，比粗口更難聽的說話：

上司：「點解我做到你做唔到？」

小薯心諗：「首先，我冇你咁多人力物力，可以隨時叫幾個下屬入嚟幫你一齊諗嘢。其次就係，你喺公司高級過我，你對於公司嘅要求自然熟過我啦！好多資料你接觸得到我又接觸唔到，咁我邊有你咁清楚做嘢嘅準則呀？而最緊要嘅係，一件事究竟係啱定係錯，好多時根本冇一個客觀嘅標準，你做上司嘅話係啱，就係啱；話係錯，就係錯，咁你玩曬啦！我邊夠你玩呀？！」

上司：「阿邊個做嘢仲多過你啦，又唔見人哋出聲？」

小薯心諗：「人比人比死人，人哋做到五勞七傷唔通我又要學佢？佢做到冇日冇夜根本就係喺一個扭曲咗嘅標準之下生存。你依家嘅玩法係根據其他人扭曲咗嘅標準，然後就將佢合理化，再希望套落我身上。佢唔出聲唔代表件事冇問題，而我出聲，亦都唔代表我嘅要求唔合理。」

上司：「你放工都冇嘢做㗎啦，不如做埋呢啲嘢先走。」

小薯心諗：「我放工有冇嘢做係我嘅事，同我應唔應該OT完全冇關係，就算我冇嘢做，夠鐘放工之後我都可以離開公司呼吸自由嘅空氣。成日都用我放工冇嘢做當係藉口叫我OT，咁就梗係會搞到我想培養乜嘢嗜好都唔得啦，咁咪變成一個惡性循環，又畀你用冇嘢做作為藉口叫我OT？」

上司：「又話自己大學生，乜你咁都唔識㗎，你學校冇教㗎咩？」

小薯心諗：「唔該唔好有事冇事就用我係大學生嚟侮辱我，你話我乜都唔識，咁唔通我又話呢啲咁雞毛蒜皮嘅嘢大學係唔會教㗎咩？！唔通我又話大學係train我去大公司做嘢而唔係喺你呢間蚊型公司做嘢喇喎？個個人都係邊做邊學㗎喇，我就係唔信你全部嘢都係喺大學度學返嚟，夠膽不如你拎張transcript出嚟對下邊樣嘢係邊一科度學返嚟！」

上司：「有本事咪唔好撈囉！」

小薯心諗：「想炒我咪出聲囉，又唔想賠一個月糧，又想逼我走，世界上真係冇人縮骨得過你！我都想講返一句，你有本事咪用咁低嘅人工請過另一個人囉！」

結語
不少管理能力欠佳的上司都會錯誤地以侮辱下屬去提升其的工作表現。但士可殺，不可辱。即使下屬不作即時的反駁，但並不代表內心深處不會受傷。經常侮辱下屬，最終只會破壞工作關係，自食惡果。

文：半宅職薯
企業培訓師。明白進修無涯有盡時，相信職場浮沉還要看歷練。

investMAN
For People of Style & Substance
掌握理財智慧 感受生活品味
http://facebook.com/investMAN.hk