聖誕係普天同慶大日子，Twins提早約咗近百粉絲喺屯門開Party狂歡，偶像見證粉絲長大，當中又加入咗唔少新血，Twins家族越嚟越熱鬧。Twins仲帶咗禮物嚟同粉絲玩抽獎，實行人人有禮物，皆大歡喜，最開心當然係Twins同粉絲逐一合照，同埋互動玩遊戲，粉絲們都好守秩序，Twins仲唔介意做人肉紙版。

蔡卓妍（阿Sa）同鍾欣潼（阿嬌）唔鼓勵粉絲破費送禮物，反而希望粉絲可以用買禮物嘅錢行善，阿Sa話：「幾年前開始，無論聖誕或新年，我呼籲fans捐錢，我覺得用我哋個名去捐錢幾好，更加有意義，好多嘢我哋都有，唔係咁必需。fans由細跟到大，又有新成員係年紀細細加入，我希望互相影響，細細個培養佢哋幫助人哋。」阿嬌都和應：「將愛心帶出去。」

呢次聚會，Twins大家庭多咗一對萌爆姊妹花，佢哋係5歲嘅家姐豆豆同3歲幾嘅妹妹毛毛，毛毛好有心思，DIY咗紙手鍊送畀Twins做聖誕禮物，o氹到阿Sa同阿嬌好開心，毛毛仲表演埋唱歌，大唱羅文嘅經典金曲《激光中》，雖然毛毛年紀細細唱到走晒音，不過阿Sa都聽得好開心，仲完笑唔停。

Twins今年齊齊宣布「封盤」，佢哋先後被踢爆蜜運中，阿Sa戀上「百億麻將館太子爺」石恆聰，而阿嬌就撻着台灣「醫界王陽明」賴弘國。可惜佢哋拍拖後首個聖誕，Twins要出埠做騷，未能兩pair人一齊共度佳節。

阿Sa就話唔介意聖誕要開工：「賺錢中度過，聖誕梗係要賺錢啦。」阿嬌就話：「大家都係嗰啲時間賺錢啦！」賺錢大過戀愛？阿Sa話：「呢行忙嘅日子都係聖誕新年，唔忙就慘。」阿嬌話：「咁專業㗎嘛，有job梗係接啦，有錢唔通唔賺咩。」Twins今年出埠工作，然後一齊度聖誕，近年大時大節，佢哋都係一齊度過。

阿Sa突然回憶三年前同阿嬌過嘅一個聖誕節，佢話：「我哋有一年，平安夜做完嘢，知對方第二日冇人約，我哋住得近，咪自己約自己，去咗附近一間餐廳，500蚊一位食聖誕大餐，有鵝肝食，抵到不得了，仲有紅酒同香檳飲，有Bingo玩，阿嬌仲抽到獎。」阿Sa話擦完聖誕大餐，佢哋仲去咗睇戲，嗰年雖然冇拖拍，但過得好warm。

場地：屯門貝爾特酒店－貝爾特酒廊
化妝：YannesLee@ndnco（蔡卓妍）、AndyLeung@ndnco（鍾欣潼）
髮型：Wil Tam@Fifth salon（鍾欣潼）

更多娛聞，喺晒《娛果》
http://fb.com/appledailyent

【聖誕搞邊科(6)】今年聖誕有著落 黃心美話要同男友靜靜過聖誕
http://bit.ly/2BqBIGW

【聖誕搞邊科(5)】伸手入聖誕老人下體 聶安達：費事破壞氣氛嗌非禮
http://bit.ly/2zgSyGx

【聖誕搞邊科(4)】毛冷雪人裝飾聖誕樹 周汶錡母子溫馨Kiss
http://bit.ly/2CWqF8P

【聖誕搞邊科(3)】短髮性感過長髮 心悠BB聖誕節冇人約？
http://bit.ly/2kVtfEJ

【聖誕搞邊科(2)】「釣金龜」要乎合三個條件？何傲兒嬲豬﹕我真係唔係睇錢
http://bit.ly/2kUkB9i

【聖誕搞邊科】天佑搵Miss Hunny學玩「波波」 又南首次施法即搞掂
http://bit.ly/2DmZV2a