近日在北京開兩會的港區人大、政協，似乎將早前中央只支持林鄭月娥做下屆特首論調降溫、中聯辦主任張曉明亦力斥西環為林鄭拉票是「謠言」，但有政界中人稱，這不代表挺林鄭的京官或西環改變立場，只是之前做得「太過火」，令中央領導負上「欽點」特首之名，所以要稍作「降溫」。有民主派選委指，就算北京如何掩飾，「香港人睇得好清楚，今次欽點林鄭做得幾難睇，冇人信冇欽點」。
該民主派選委從建制中人聽聞，中央有領導對港澳系統及西環為林鄭箍票手法有頗大意見，「有建制派話，有領導覺得做得過火，中央話明唔好畀外界覺得搞欽點，西環就要搞到人人覺得中央已欽點咗林鄭」。

范徐麗泰變相認有欽點

另一建制派對他說，香港始終是一國兩制，「將內地一套威逼利誘選舉手法用於香港，聽聞最高層都好有意見，認為形像太差，不能完全將內地一套用在香港」，所以張曉明力斥為林鄭拉票、有方法查到選委投票是「謠言」，因為怕被問責，「有乜好得過推落反對派造謠？但明明寫用手指模驗票，就係左報梁粉專欄，西環根本冇得賴」。
另一政界人士更稱，雖然北京想為中央只支持林鄭月娥做下屆特首論調降溫，但挺林鄭的人大常委范徐麗泰，不斷強調中央「風向冇變」，「咁咪變相承認北京有欽點特首！」他直言若中央不支持的特首候選人是民主派，「相信香港人會理解」，但現在林鄭、曾俊華同樣做過司長，「曾民望又高過林鄭，建制、左報又係咁揼曾俊華，如果林鄭再高票當選，北京仲話冇欽點、冇逼選委投票，你估有冇香港人信？仲有冇人信北京有誠意落實一國兩制？」

季陶
周一、三、五刊出