今季喺曼聯長坐後備嘅「小豬」舒韋恩史迪加喺星期一同前拜仁慕尼黑隊友夏格維斯喺曼徹斯特食飯聚舊，不過，焦點就落喺小豬嘅太太、前網球一姐伊娃諾域身上。

因為伊娃喺落車時下意識咁按住小腹，而喺濕冷天氣下，小豬就對伊娃全程貼身照顧、呵護有加，唔通伊娃有喜？其實，早喺1月時，祖籍塞爾維亞嘅伊娃已現身貝爾格萊德一間婦科醫院，仲同婦科醫生施積域合照，所以伊娃真係有喜都唔出奇。