AT17嘅《GIRLS GIRLS GIRLS 演唱會》噚晚喺灣仔伊利沙白體育館完成首場演出，全晚觀眾反應熱烈，盧凱彤（Ellen）太太、43歲台灣著名攝影師余靜萍亦有捧場。喺中段表演unplugged環節時，林二汶話：「呢個Setting令我諗起以前我哋喺黃金海岸唱歌，得四百蚊仲要收唔到錢，當時係唱王力宏同周杰倫，因為好紅。」Ellen再話：「好彩有明哥(黃耀明)簽咗我哋，等我哋以後有自己歌唱。」

之後佢哋分享分開發展後嘅苦與樂，二汶話：「分開後我最鍾意嘅係我試衫時就算要著加大碼都唔需要慚愧，因為身邊嗰個盧凱彤係著加細碼，你喺佢身邊只有一個灰字。」又講到分開後嘅苦，二汶話：「我唱歌唔慣冇咗你喺隔離彈結他，我唔係話其他人彈得唔好，總之我就係唔習慣，最唔習慣嘅係你唔喺我身邊。」Ellen亦讚二汶有一把靚聲，旁邊嘅二汶話：「我覺得我個人靚過把聲。」Ellen繼續講：「有日綵排佢突然望住我一分鐘唔出聲，然後話我真係好幸福，因為你個拍檔真係好靚。」聽到全場大笑。

Ellen繼續講：「同二汶分開後我無咗方向，人生變得心如止水，即係死水。生命中冇咗林二汶少咗好多歡樂，佢係一個放屁都要同我講嘅人，女歌手邊個會咁？」二汶就話：「有邊個女歌手唔會放屁？」Ellen話：「係得你又靚又叻又放屁。」

Ellen仲話：「獨立後我試過好多外來搵方法補救，無論學唱歌、做咗個通鼻塞手術，抑或係搵風水師換粉紅色床單都好，但都唔及二汶呢幾個月同我傾偈，唔係你喺我14歲時見到我主動問我攞電話，我哋唔會組成AT17，多謝你俾咗一段咁好嘅青春我。」

到Encore環節，兩人換上一紅一綠閃閃外套，十足聖誕裝飾咁唱咗兩首聖誕歌應節，然後再唱出Heavy Metal版嘅《金魚歌》High爆全場，去到最後一曲前，Ellen話要公開多謝一個人，正常全場起哄以為Ellen要多謝在場的太太時，佢話：「唔係呀，我要多謝我醫生，呢幾年過得唔算係平坦嘅路，佢陪咗我好多，令我每日有力量起身做所有事，多謝佢。」

更多娛聞，喺晒《娛果》
http://fb.com/appledailyent