李八方online︱波波做湯家驊學校畢業禮主禮突甩底
蘋果日報 2021/06/18 16:06
湯家驊陳茂波薛永恒
點解波波突然甩底呢？
前排民建聯搞嘅「政道」課程開學禮，咪有特首林鄭月娥做嘉賓嘅？其實行會成員湯家驊有份成立嘅香港政治及行政學苑，幾年前已經同港大專業進修學院搞文憑課程，第三屆畢業禮聽日都舉行。可惜同人唔同命，原本答應聽日去畢業禮嘅財政司司長陳茂波突然甩底，得返位問責局長現身支持。
其實香港政治及行政學苑個課程喺2017年嘅開學禮，都有林鄭現身。而嚟到今年，第三屆畢業禮原本搵咗陳茂波做嘉賓，點知主辦話今日話，因為波波臨事有事嚟唔到，所以主禮嘉賓變成創新及科技局局長薛永恒。咁真係多謝晒喎，但到底波波有咩緊要事突然甩底，就不得而知喇。
-----------------------------