曾志偉、鄭伊健、陳小春、謝天華、林曉峰、錢嘉樂同倉田保昭等噚晚乘坐超級跑車出席沙田舉行電影《黃金兄弟》首映禮，佢哋不少圈中好友洪金寶、高麗虹、鍾鎮濤、薛家燕、張達明、李若彤、袁潔瑩及余安安等現身捧埸，湯盈盈與康子妮亦到埸支持老公，而《古惑仔》系列中演「o靚坤」嘅吳鎮宇上台合照時話：「我哋部戲(逆流大叔)落畫係為咗避開你哋之嘛。」儀式上，身兼導演、演員的錢嘉樂表示好感動，好似係佢哋五兄弟嘅BB出世咁，最後一眾人切巨型月餅預祝票房大賣。

之前到過台灣及北京舉行首映禮及見面會，錢嘉樂估唔到台灣觀眾要求播放廣東話版，希望聽到原汁原味版本，佢話：「我哋幾兄弟18年之後仲有呢個效果，好開心，返到酒店之後，我哋傾偈傾到四點幾，仲要畀人投訴，諗唔到有咁好效果，我同佢哋講唔好咁驕傲，最緊要不忘初心，若果拍第二集唔好收得咁貴，呢句係同謝天華講。」原來當晚監製曾志偉到電他們說：「玩可以繼續玩，但係酒店經理話要靜少少。」

伊健表示北京站同樣反應熱烈，錢嘉樂最感動聽到有人說：「我哋想要嘅香港電影返嚟啦。」返港宣傳，小春指終於返到主場，今次係佢正式睇部戲，感覺有啲震震地，之前有影評人同佢講，忍唔住滴咗兩滴眼淚，問佢有冇準備紙巾入埸？佢話:「用衫抽抹，或者抹落隔離兄弟度。」眾人指戴住金煲呔天華片酬最貴，天華笑住話:「因為我(對白)講得少，除開就係最貴。」

講到開拍續集，伊健指享受埋今晚先，錢嘉樂話:「睇埋今次成績先，不過今次工作好似娛樂咁，所以做兄弟真係要有今生亦要有來世，執行監製同我講志偉話盡量要滿足導演錢嘉樂嘅要求，唔好cut budget，最終超支咗成幾千萬。」錢嘉樂好有信心能夠回本，因為今次係佢用咗三年時間用心去拍攝出嚟。至於續集會否搵埋老婆仔女出嚟拍？ 佢哋話:「過唔到小春嗰關，因為佢極力唔畀個仔入行。」

對於錢嘉樂指監製曾志偉大力支持，志偉笑說:「都洗濕咗個頭，唔係點呀。啲毛片返嚟都ok，老闆話好呀好呀繼續去，最緊要係出嚟嘅成績。前後拍咗兩億幾，我都未曾試過拍咁貴，但係我作為監製係唔可以畀導演有擔憂，就好似縱壞個仔咁不停畀嘢佢。」志偉笑指之前在北京時，一班老闆問我同錢嘉樂為何還不上契。志偉又指錢嘉樂是用錢合理，籌備到拍攝至後期都非常專心，更推掉兩部戲。至於會否開拍續集，志偉話:「要睇觀眾嘅反應，佢哋個個都要裝香。我同佢哋講今次未必係人生之中最開心嘅時間，但一定係最難忘，佢哋平時都約唔到一齊食飯，但係之前11個月嘅經歷係好難忘，睇到佢哋感情嘅增長，由好兄弟變成更好嘅兄弟。」

精選娛聞，喺晒《娛果》
http://fb.com/appledailyent