近日有傳林保怡因為頂唔順王喜霸道而拒絕主持無綫節目《江山美人》決賽。但噚日有網友tws6=9喺香港討論區上，上載「一B@員工爆料」告密信，爆「笨蛋」藝員被拍檔「巨星」欺侮，雖然信件冇開名，但內文蛛絲馬迹就顯示係講緊王喜同林保怡。

聞猛男相陪兜圈

告密信中含沙射影數林保怡罪狀，話有兩位年輕猛男輪流到內地擔任佢嘅助理，一個係武僧、一位係前泳將，又話有人拍外景嗰陣鍾意喺車上用手機大聲播出自己嘅陳年舊歌，嘈到成架車嘅人冇覺好瞓；仲講明每個鏡頭最多拍三次，但自己就成日唔記得對白，搞到要拍檔記埋佢嘅稿。如果大家有睇《江》節目，不妨諗吓邊位主持食咗啞藥唔講對白，就會估到邊個演出唔上心。
噚日馮仁昭打畀王喜，佢強調同林保怡合作OK，至於對方身邊係咪有兩名猛男相陪，王喜話：「助理唔係男就女㗎啦，但我唔清楚人哋嘅來歷。」王喜喺電視城遇到記者時，對於被林保怡話頂佢唔順，佢就有少少委屈話：「件事唔係我搞出嚟，你哋唔好問我，以我所知保怡唔係你哋所講咁唔做，係佢撞期做唔到。」噚日馮仁昭都有打畀林保怡，可惜佢電話飛去call台冇回覆。
至於《江山美人》嘅八位參賽者，噚日喺將軍澳電視廣播城着上兩件頭泳裝綵排，喺影大合照時有佳麗為擺甫士頻頻起踭，8號趙瑩瑩就用普通話話：「我這人手踭已經最低，將就了一下。」