中國駐特區外交部特派員楊文昌話：公務員及商界，「可以」各一人競選特首，又指示：只要大多數港人接受，中方就可以接受！
楊某講嘢，都重幾開放，點知一到咗本地親中分子口中，即時自動加緊幾分！紡織商人陳永棋話：下屆特首，首先要「中央接受」，其後係港人接受，跟住係可以「團結」各方面利益！
何物陳永棋，胡說八道？楊文昌話：「只要大多數港人」接受在先，「中央」就可以接受，輪到某些人解釋，倒果為因，將港人意願，置於「中央」決定之下，港人治港，真係變成空話。
查實，楊文昌主管「外交」，特首選舉，唔通係外交事務，香港屬於「外國」，故此要由一名外交官來發言？
若然限定公務員一人、商界一人，根本就係干涉特區內政！不過楊某只係話「可以」，又冇話限死係兩個！換言之，最少係兩個，都冇話唔得！