求驗客手記:橙兵喪蒲尹佩斯借勢插英軍 - 求驗客

蘋果日報 2011/06/12 06:00


阿仙奴嘅尹佩斯(圖)近日就對某啲英超球星成日夜蒲嘅生活好不滿,呢位荷蘭箭頭話:「當我見到有啲英超球員經常落D落到凌晨3點幾,我覺得佢哋嘅足球生涯都係到33歲左右。對我嚟講,有規律嘅生活係好重要,我每朝早都一定要同我兩個小朋友食早餐。有啲人經常選擇落D過日辰,而我就只係忠於我嘅足球生活。」其實尹佩斯以前咪又係蒲精一名,日前佢嘅一班荷蘭隊友好似古積特、亨特拉爾等參加性派對,仲畀傳媒踢爆;家仲要拖埋其他英格蘭球員落水,睇嚟佢都係想借題發揮,掩飾同胞嘅惡行啫!