任總忽然自爆唔舒服,又有兩聲咳,議員即刻提高戒備,恐防豬流感殺入立法會,白鴿黨卿姐就同任總講,「如果你有乜事,我情願你唔好嚟,否則傳染晒畀我哋,全個委員會同啲街坊中晒招,所以一定要小心,你都知今日維景酒店先解封,我哋唔想封咗立法會。」
唔係人人都同情任總,醫學界議員梁家騮奉勸任總保重身體之餘借題發揮,話醫生幫病人開刀前,就算講清楚手術風險,萬一真係發生醫療事故,都唔可以隨便甩身,分分鐘俾人告,即係任總縱使早就警告小市民迷債係高風險金融產品,但事到如今,任總都唔可推卸責任。
家四處都係病菌,任總中招都唔出奇,不過有雷曼苦主話,任總周身唔聚財、成日唔舒服係意料中事,因為早幾日成班苦主操去中環國金,喺金管局總部外起壇,將任總當小人咁猛咁打,大嗌:「打你個小人口,等你有氣冇碇唞,退休日日嘔;打你個小人胸,等你呼吸唔暢通,花紅冇得用;打你個小人鼻,等你開口夾着脷,監管要企理。」
俾人咁打法,又不斷受到辛辣詛咒,難怪任總俾人打到謝晒,之不過任總係高手,就算狀態麻麻,反應都冇明顯失色,回應議員質詢時一樣詞鋒銳利,不時反寸議員,口舌之爭都寸土不讓。雖然已經審咗四次,不過雷曼小組仲未夠喉,要求任總本月15號再出席聆訊,任總卻面有難色,話月中可能有要事處理,希望彈性安排聆訊時間,乜嘢咁大件事呢?消息話唔係宣佈退休,可能係北上簽署落實人民幣貿易結算諒解備忘錄。
mailto:
[email protected]