劉德華嘅紅館演唱會，本來係跨年演出，由今個月15號唱到１月３號，但華仔唱到第14場就因為流感，醫生建議他要休息，故他忍痛決定取消餘下共7場演出。

今日大除夕，唔少買咗今晚門票嘅華仔fans，都好期待晚同偶像一齊倒數，雖然願望落空，但好多買咗飛嘅fans，今晚都照去紅館影相留念。

有10幾個來自惠州及成都嘅樂迷，對於華仔取消個唱表示很心痛：「有少少失望，但係最緊要他身體健康，希望他早日康復，快點好起來，加油。」佢哋仲講到明唔會退票，直言門票係華仔畀佢哋嘅承諾：「祝福他早日康復，早日兌現承諾。19年，祝福他萬事如意，早日康復，加油。」

而來自福建及武漢嘅fans，對於無騷睇都有失望，但話會繼續支持華仔：「只要他健康，無論以後何時開、哪裏開，我們都會來，愛他一萬年。」佢哋仲話肯定唔會退票，要留番張飛做紀念：「張飛貴咗少少，但係冇所謂，無論點我哋都會支持， I love you。」

而來自北京嘅女fans，連續買咗5場演唱會嘅飛：「由昨天開始到3號的門票，不會退，為甚麼要退？」問到佢哋係咪好失望佢就話：「還好吧，他身體好比甚麼都重要，祝福華仔身體好起來，準備好的時候，我們就會來。」佢哋仲話因為住喺附近嘅酒店，所以特別嚟紅館睇下，見到工作人員收拾音響，都有影相留念。

記者向紅館票務處查詢，有職員表示今日有數十人查詢退票事宜：「但係我哋未知詳情，都係要跟番主辦發嘅告示。」而現場亦張貼咗多張以繁體、簡體同英文寫嘅通告。

精選娛聞，喺晒《娛果》
http://fb.com/appledailyent