【李八方online】11月每日平均7,000人搭 昂坪360載客量破歷來紀錄
昂坪360楊美珍港珠澳大橋李八方ONLINE劉偉明關敏怡
昂坪360主席楊美珍(中)連同兩任董事總經理劉偉明(左二)同關敏怡(右二)炮製愛心朱古力慰勞員工。昂坪360圖片
自從港珠澳大橋通車之後,第一個「受惠」嘅當然係東涌,而昂坪360更加係最受國內同胞熱烈支持。噚晚喺迪士尼樂園酒店舉行聖誕晚宴,席間就透露,昂坪360上個月每日平均賓客人數多,有成7,000人,仲打破埋開業以嚟最多人嘅11月。另外,由於關敏怡聽日就離開董事總經理一職,並由劉偉明接替。
昂坪360董事局主席楊美珍喺晚宴上話:「港珠澳大橋10月正式開通後,到訪昂坪360賓客人數屢創新高,11月每日平均賓客人數更高達7千人,打破開業以來同月份的紀錄」,之後佢、劉偉明同關敏怡,仲同朱古力大師古嘉俊整咗個心形朱古力派畀同事。
另外,關敏怡聽日就會離任董事總經理,而商務總管劉偉明就會署任董事總經理。劉偉明喺開業前已經加入昂坪360,而家負責管理公司纜車業務同昂坪市集嘅零售同租務;昂坪360話喺佢任內積極開拓海外同內地市場,或者因為咁加上受惠於呢個港珠澳大橋,令佢再獲提升。