迪士尼公司早前宣佈將《花木蘭》拍真人版電影，迪士尼曾經喺1998年將呢個代父從軍嘅中國家傳戶曉嘅古仔拍成動畫，消息指傳今次開拍真人版，主角花木蘭同李翔會由華裔演員演出，但會增加一個白人商人嘅角色，由佢嘅角度去睇呢個故事，現時已經喺進行全球大規模試鏡。近日，有傳迪士尼方面曾經斟洽台灣名導李安執導，但已遭李安婉拒，片商將會繼續搵合適嘅亞洲導演人選。

其實除咗迪士尼準備開拍真人版《花木蘭》，Sony電影公司亦落實會拍攝一個《花木蘭》故仔嘅電影，Sony搵嚟《魔鏡．魔鏡：白雪公主決戰黑心皇后》（Mirror Mirror）嘅編劇炮製劇本，演員同導演將會係亞洲人，籌備工作暫時一切都係初步階段。今次迪士尼同Sony撞題材，不過迪士尼方面已定電影喺2018年11月2日上映，似乎迪士尼都搶先一步上映。