一年一度嘅《MAMA音樂頒獎禮》將於下月2號喺香港亞博館舉行，不過今年《MAMA》認真是非多多，之前擁有BIGBANG、iKON等團隊嘅YG就話因為冇收過《MAMA》邀請，所以未知去唔去《MAMA》，之後YG方面就話已確定BIGBANG、iKON、2NE1嘅CL、PSY等都會亮相《MAMA》，當呢頭YG方面話去《MAMA》之際，原本都話出席又安排旗下組合包括CNBLUE、FTIsland同AOA出席《MAMA》嘅FNC事務所，最終又話佢哋難夾檔期，所以全部都唔出席。

原本冇FNC嘅藝人，但有YG同SM事務所嘅團隊撐場，《MAMA》都算星光熠熠，不過SM方面嚟《MAMA》嘅名單一直未公佈，當中SM旗下嘅少女時代同EXO基本上年年都會參加《MAMA》，但直到0依家，《MAMA》方面都仲未公佈到底少時同EXO會唔會出席，由於佢哋喺本港擁有大批粉絲，如果少時同EXO都唔出席，真係會令到《MAMA》幾失色。

而現時離《MAMA》仲還剩下一星期左右嘅時間，如果少時同EXO等SM旗下組合都唔亮相《MAMA》嘅話，情況就好似早前舉行嘅大鐘獎一樣，冇星出席攞獎。

根據歌謠界人士透露：「EXO同少時出席嘅可能性係好高，雖然現時仲未能完全確定，但係大會亦都知道冇SM嘅歌手情況下，對於頒獎禮會有一定影響，現時《MAMA》已經面臨最壞嘅情況，雖然大會現時正忙於準備舞台設計，但仍舊要繼續積極同EXO及少時方面溝通。」

又話：「面臨頒獎禮嘅緊迫進行，主辦方電視台同歌手所屬嘅公司之間嘅權力遊戲係非常激烈的。YG歌手同大會溝通成功已經令到其他娛樂企劃社心情非常糟糕，如果有歌手拒絕出席攞獎，亦都唔排除係因為YG歌手傾掂數。」

而外界都普遍覺得因為YG同《MAMA》已經講掂數，無疑令其他歌手變成陪襯品，所以SM方面亦會盡最大努力同《MAMA》方面協商，希望喺大獎方面絕對唔遜色比YG。