日股欲跌還升，恒指跌過81點後，埋單只係唔見4點。H指靚好多，有1.3%進賬。紅指亦唔差，升0.7%。中央有大人物周末來港賀回歸，就當帶兩梳蕉到來，啲氣氛都會好好哋。6月底半年結，基金要做嘢。6月至今為止，恒指跌咗53點，過多4日，6月份埋單有機會高過5月底。
網通C輪3627：網通（906）收12.70元，升1格。有報道話西班牙電訊公司Telefonica揸網通5%唔夠喉，年底前會再添食5%。
係真唔係真，唔知，但網通具備低PE條件（7倍幾），有資格升高一兩元，雞仔注買C輪。
網通C輪有8件，獨係3627交投唔錯，有30球轉手。
隻輪12月初夠鐘，輪價15.9仙，溢價13.3%，槓桿率8倍（有效4.6倍），引伸波幅46.8%。隻輪溢價唔低，引伸波幅亦係，但其他網通C輪更加冇吸引力。條氣唔順，唔想畀咁嘅溢價咁嘅引伸波幅，則只有揸正股。

恒指C輪4764：博大市好好哋，當然可以吼吓恒指C輪，4764與4796差不多，同係8月底夠鐘，短炒對象。
4764輪價20.1仙，溢價3.4%，槓桿率21.3倍（有效12.2倍），引伸波幅24%。想搏殺啲，揀4472，7月底到期，短炒計，賭4472贏輸會比4764大1半以上。
章盛