李八方online︱許智峯羅冠聰英國重聚 「正式做隊友」
蘋果日報 2020/12/11 12:28
許智峯李八方online羅冠聰英國流亡
先後流亡到英國嘅羅冠聰同許智峯，終於可以重聚。
流亡海外嘅前民主黨立法會議員許智峯，前排已經由丹麥安全到咗英國倫敦。雖然銀行戶口被凍結嘅事情未解決，但係阿峯都似乎安頓緊落嚟，佢仲同一樣喺英國流亡嘅前香港眾志創黨主席羅冠聰碰頭添。許智峯形容今次短聚「百感交集」，表示兩人「正式做隊友，繼續為香港打一場硬仗」。
阿聰喺社交網站發佈同阿峯嘅合照，見到阿峯嘅氣色似乎唔錯。阿聰仲留言話：「人在海外，互相扶持，總有能為香港付出的角色崗位。」話時話，阿聰同阿峯都係2016年立法會選舉港島區嘅當選人，估唔到兩個都不約而同流亡咗去英國。阿聰寄語阿峯要保重嘅同時，亦都話「光復香港路上共同努力」。
羅冠聰（左）同許智峯（右）兩位2016年立法會選舉港島區當選人，估唔到喺2020年流亡英國時重聚。（羅冠聰Facebook專頁圖片）
羅冠聰許智峯攝於初選論壇上，燒味飯之後。羅冠聰fb圖片
及後許智峯亦於社交網轉貼合照，謂今次短聚百感交集，「對上次見你在初選論壇上，還被笑我們互相『交波』，現在我們就正式做隊友，繼續為香港打一場硬仗，為了仍在受苦的手足，拼死也要打下去」。許又感謝羅冠聰嘅分享，話「國際線遼闊無邊，需要很多分工及策略討論」，仲話已同咗同樣流亡海外的前香港大專學界國際事務代表團發言人張崑陽通電話，連結國際手足。
許智峯所講嘅「交波」，其實發生喺《蘋果》。許宣佈流亡之初，羅冠聰喺fb撰文，題為「離別的人，全都是趕在回家路上的孩子」，憶述對上一次與許智峯見面，就係喺羅離港前嘅初選論壇上。初選論壇在《蘋果》大樓舉行，兩人喺餐廳相見，彼此納悶唔知論壇有咩好講，羅冠聰提出「互問」打圓場，許智峯爽快答應，話「其實我都唔知要問咩」，於是喺論壇上上演一幕「交波」嘅對話，顯得互相尊重之餘，亦畀對方時間講自己理念。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！