中原集團主席兼總裁施永青出席論壇表示，之前都話樓市下半年會慢返少少，目前既有財富未必即刻少落來，睇資金點樣流，流向股市多，抑或流向樓市多啲。「之前都話商品市場會好啲，會唔會即刻好明顯咁樓市會慢啲？股市氣氛一差，慢慢影響樓市，但宜家股市未出現咁嘅氣氛，而家股市出現2次調整，但唔會一插到底，而係反反覆覆，之前個個睇好，而家反覆向下調整的機會率會有所增加，目前需要相對審慎啲。」

他重申：「之前話今年樓價升8%至10%，但而家第一季都升左3個巴仙。而家變數多咗，下半年要睇睇情況，只能夠話利淡因素正在增加。我的睇法係咪變成投資者及市場玩家的睇法呢?唔係咁快，因為我屬於敏感度比較高的人，好多人睇到都未必相信住。上周CCL仲創新高，指數滯後1至2周，相信未來仍會上升。但今年第二季相信升幅慢過第一季，呢樣嘢講住咁多先！」

被問現在入市是否摸頂?施永青回應：「我好早已話而家係收割期，唔係播種期。人哋收割去播種，梗係有風險。有新資金流入，需要為資產重新配置，呢啲人咪繼續買囉!但如果得一注錢，呢個時候投資未必係太好嘅時機!」

被問空置稅?他自言，上世紀90年他曾經提出，「當時無乜人講，用途是令社會的資源不要荒廢，逼佢出租或出售，有人用。但而家香港空置情況唔嚴重，政府要對症下藥，如果香港空置率15%，你咪收空置稅囉!但而家空置率得3.7%。香港的發展商個別有人囤積居奇，但大部份都係盡賣，空置稅無意思，佢唔會增加供應，只是將原有賣出來。而家香港發展商呢方面問題唔嚴重，單靠呢樣野解決唔到問題，與其收空置稅，不如將精神用係真正有用的地方。」

此外，中原地產集團大灣區設分公司，期望建立資訊大平台，提供當地房地產數據及資訊，但大灣區涉及三個不同行政體制，要對當地人流、物流、資金及數據要作出協調。

記者 黃朗鈞

蘋果財經，關心你飯碗
http://fb.com/appledailyatm