黃心穎同艾粒今日去到銅鑼灣為「港式奶茶日」做揭幕，心穎BB即場沖奶茶畀艾粒飲，艾粒笑住話未飲都知正。心穎BB習慣每朝飲杯齋啡去水腫，下午茶就同同事嘆奶茶。講到噚晚封胸露背上陣輸蝕，佢話：「件衫係我意思，着衫係舒服先有自信，唔係為露乜。」

平時都會擔任晚宴司儀，都有試過失手，問佢會否講錯粉身碎骨？佢話：「都可能會，嗰句成為話題都幾得意，唔會睇成為錯誤。」早前同家姐心美獲邀一齊擔任司儀，佢笑言姊妹兩人喺屋企都冇對稿，但上到台就好有默契，期望同家姐多啲合作機會。

艾粒為活動唱歌兼代言，酬勞相當滿意，佢哋指將收入儲起，少爺占就留待仔仔讀書基金，Donald就儲埋做嘆世界基金，佢仲話：「少爺占數口叻，成日教我哋投資。」少爺占笑指近排樓市抽稅重，轉投資外幣如日元同澳元。