由「收視女王」孔孝真跟《Oh我的鬼神君》男星趙正錫主演嘅新劇《嫉妒的化身》未播已經多是非,早前曾傳出孔孝真要求多多,要換導演及攝影導演人選,而KBS又炮轟《嫉妒的化身》製作公司,反口唔跟KBS合作而跟SBS簽約,激到KBS話會採取一系列措施嚟應對。
而KBS噚日就宣佈放棄《嫉妒的化身》嘅播出權,表示:「經過多方面商議,最終決定唔於KBS播出電視劇《嫉妒的化身》,目前正討論替補作品。」
而《嫉妒的化身》嘅劇組負責人就回應:「新劇原定於KBS播出,但由於播出時期跟製作行程唔配合,因此決定於SBS播出,加上SBS方面給予積極回應。」
無論點都好,新劇總算係已落實於8月播出,相信「收視女王」孔孝真嘅演出唔會令人失望。