【李八方online】飛天朱去信習近平 狠批689用特權施壓
蘋果日報 2019/09/22 18:08
梁振英習近平全國政協飛天朱
最愛喺「亂」世出動添煩添亂嘅前特首、全國政協副主席梁振英，呢排追打上屆佢有份委任做副局長、現為教育局局長嘅楊潤雄不遺餘力，就住教育局只向發表過仇警論嘅真道助理校長戴健暉只發譴責唔足夠，直斥楊「姑息養奸」，語調非常嚴厲。前港區人大代表朱幼麟對689退而不休指指點點好不滿，向中國國國家主席習近平發公開信，狠批689做法不當，形同話畀人知，「官大，有特權，甚麼事都可以直接管」，反問今時今日嘅香港，「到底，是否是人治多過制度、法治？」不忘向689發溫馨提示，「香港退休特首要真正退休」，強調中央同特區嘅各種關係、互動、工作，需要分工、分責同制度化。
人稱「飛天朱」嘅朱幼麟早喺今年6月已聯同多名前公職人員聯署，力促林鄭撤回「送中」惡法同暴動定性，並成立獨立調查委員會，一直冇「姑息養奸」。而佢前幾日見到689大鬧楊潤雄就處理教師資格「拖泥帶水，姑息養奸」 ，唔知係咪施壓成功，因為楊潤雄回應時竟然話「會深深反省」，觸發飛天朱要向習近平發表公開信，表明香港人回歸後最怕嘅就係「香港內地化」，特別係政治上嘅「關係」同「人治」，認為今日香港所有政治問題、年輕人嘅問題、我哋失去整整一代人嘅問題，都同呢點有直接關係。
飛天朱接受八方查詢時話，香港人最驚就係香港「內地化」同人治，而689早前以前特首、全國政協副主席身份透過Facebook直接批評楊潤雄，正正係做咗香港人最驚嗰樣嘢。佢認為楊潤雄聽到689嘅批評後，應該向身為中國國家領導人的689指出，如果佢對其工作有意見，應該私下向中央港澳工作系統表達，再由該系統轉告林鄭，而唔係自己透過Fb直接向佢提出。飛天朱亦認為楊潤雄應該向689指出，自己現時嘅Boss係政務司司長張建宗、唔係689，自己有需要維護香港嘅制度。