蘇保羅在港從練不知不覺已踏入第十個年頭，最威風於06至07馬季贏52場，居練馬師榜第二位，不過對上三季均贏不足20場。蘇廄上季初表現係威係勢，截至一月尾，已贏14W兼提早宣佈畢業，當時排名第14，處於中游位置。不過，二月至煞科期間，蘇保羅竟然只憑「喜寶龍威」增添一場頭馬，就連位置亦唔多，僅零星冷門馬如「友瑩格」、「福爾摩斯」及「如日方中」出擊偷襲，似乎馬房留有以待。

正正由於蘇廄在畢業後留力，令旗下馬得以回氣及評分下調，目前倉內有11駒評分比上季初為高，卻有28駒評分低於上季總編班時，當中11駒更下調十分或以上，如「北非碟影」、「勝捷勝」及「韻出真愛」等，既然馬房刻意保留實力，唔排除蓄勢在今季初搶攻。

兩隻銀行馬

「南莊多寶」五班超級：雖勝草地，但泥地亦曾見走勢，估計為泥草雙槍將。跑法主動，在五班非常有利，今季可持續反彈甚至企穩四班。

「福爾摩斯」後勁驚人：一再展現強橫後勁，504場次跑1600米末段開21秒91，為上季同程第三快時間，至少值二班，現評分可贏兩W。