去到10月中，蔡約翰馬房仍未撻着，發動攻勢較以往還要遲，暫只贏三場位列14位，比前領的方嘉柏相差12場，慢熱成咁？點解咁遲都未「嚟料」呢？仍然相信，蔡約翰有其盤算、有其時間表，我們不是他肚裏條蟲，只要注意攻勢何時起動，飲到頭啖湯固然好，若不能，跟住飲都唔算遲，最緊要把握時機。

今期蔡約翰有七匹馬跑，有新勝的「喜悅繽紛」，也有兩匹初出馬「首映」及「首飾大帝」。第一場「首映」是今季來港A布新馬，8月29日才開操，不到兩個月，便已被蔡約翰安排出賽，部署與一貫作風唔同，縱使來港前已曾試過兩個大閘且更全勝，但以往有無數這類新馬，都無咁快便跑！

莫非，蔡約翰認定進度超乎其預期，對本月4日試首次大閘，輸給92分的「世澤之星」表現感到滿意，決定作為配合「喜悅繽紛」出擊的一員？我不知，只認同試閘走勢確唔錯，今次對手只有「海翡翠」及「志友運」，不必太足也夠贏。

另一初出馬第六場「首飾大帝」，上季已來港，今季亦再試夠三課大閘才跑，更一出便跑1600米，所面對的難度比「首映」更大。上述兩駒，莫雷拉都無份跑，應是纜躉的「喜悅繽紛」才由其主轡，上季已經勁，上次季內初出未開氣，再一次遇上快步速都贏，只被加五分，留在四班，着數到不知！