韓國女團missA噚日先爆出中國成員Jia唔續約，令到missA由四人變成三個人，不過無論missA點變都好，都唔會影響到人氣最高嘅秀智地位。

工作量不斷嘅秀智同金宇彬主演嘅KBS新劇《任意依戀》將於7月6號首播，呢齣劇係以先拍後播嘅方式進行拍攝，早前佢哋就順利拍晒所有戲份，0依家等劇集喺內地審批完就可以有得睇。而KBS方面今日亦都公開咗最新劇照，相中秀智同金宇彬就喺櫻花樹下情深對望，唔知佢哋會發生乜事，網民都話超級期待。

而秀智前日就相約佢部成名作《初戀築跡101》嘅劇組聚舊，就係呢部電影令秀智被封做「國民初戀」，所以對秀智嚟講自然好深刻，而秀智同一班演員嚴泰雄、李帝勳等食完飯仲一齊合照，秀智仲大擺可愛扮花甫士，冧死粉絲。

另外，由黃靜茵、柳俊烈主演嘅MBC新劇《好運羅曼史》將於下周三新播，今日又有新花絮照公開，當中黃靜茵同柳俊烈拍緊海報，黃靜茵個樣仲好似跪求緊柳俊烈一樣。