羅馬里奧之前誓神劈願，要喺前日州聯賽作客法林明高場波衝擊1,000球大關，結果佢只省入1粒，差1球先達標。查實佢完場前單對單對住對方門將般奴，但般奴無成人之美，擋出佢嘅射門。當日唔少球迷特登入場想見證呢位華斯高老將達標，都咪話唔掃興。
呢場州聯賽由華斯高贏3:0，但相信無乜人在乎戰果。當日有4萬幾人入馬拉簡拿球場睇波，唔少人帶埋橫額同大嗌口號鼓勵羅馬里奧，而各國記者爭相採訪佢，令到比賽要遲10分鐘至開得波，認真大陣仗。羅馬里奧喺68分鐘近門射入，係佢個人歷來第999球，當人人屏息靜氣，等緊呢個歷史時刻，機會嚟啦，佢喺87分鐘近門面對般奴，點知老貓燒鬚射門被擋出。