【獎項凍過水?】YG:旗下藝人唔出席《MAMA》
BIGBANGMAMAYGMAMA音樂頒獎禮BLACK PINK
韓國年度樂壇盛事《MAMA音樂頒獎禮》將於下月2號於香港亞博館舉行,噚日主辦公佈咗第一輪嘅頒獎嘉賓名單,陣容鼎盛令粉絲更加期待。喺粉絲等待新一輪出席歌手名單之際,今日就有壞消息傳出,就係YG事務所表示旗下藝人將唔會現身《MAMA》。
擁有天團BIGBANG、男團iKON、新女團BLACK PINK等組合嘅YG事務所今日發聲明表示:「由於旗下藝人大部分於《MAMA》後皆有新曲發行或演唱會嘅行程,為咗專輯製作工作及演唱會嘅練習,公司內部認為旗下歌手難以抽身出席《MAMA》,同時我方已向主辦方傳達藝人唔會出席頒獎禮嘅消息。 」
據知《MAMA》方面亦尚未正式向歌手發出邀請,而YG嘅聲明續稱:「雖然網上投票進行到下月1日,目前仍然無法得知能否得獎,不過就算依家收到參加邀請,我方都認為藝人冇足夠時間準備於下週週末嘅表演舞台。」再次表明唔會出席。
而今次《MAMA》嘅候補名單中,BLACK PINK入圍最佳新人、iKON入圍最佳男團、「馬舞大叔」PSY就入圍最佳男歌手等獎項,當YG事務所表明旗下藝人唔出席後,有唔少粉絲認為佢哋嘅得獎機會都凍過水,大感可惜。
另外,天團BIGBANG亦已經落實下月12號、於成員勝利26歲生日當日推出新歌以回歸樂壇,令粉絲十分期待。