港股市有3件外滙Call輪,全部係美金兌日本紙,其中只有9420有成交。
9420升跌,同日圓滙價掛鈎,日圓升(即係美元跌)則隻輪散,因為槓桿率勁,所以波幅好大。
上月初,日圓造126嗰頭(美元升),近日升到上118,相等於日圓升幅6.8%,呢段時間,9420由46仙散到𠵱家嘅15.3仙,跌幅達67%。
美伊局勢緊張,美國隨時出兵,美金兌外幣散晒。去年7月同前年9月,日圓最高(即係美元最低)見116左右,即告回落(即係美元升番),今回美元勢弱,若見番116個位,有興趣博美元反彈者,可以諗吓賭些少9420。美國如果打伊拉克,美元有反高潮未定,唔跌反升。炒9420,要預咗風險好大,但有個好處,唔使好似炒滙咁,睇錯市要斬倉甚至上身,輸晒都係窩輪嘅銀両。
揸恒指Put輪者宜收手
恒指散124點,恒指Put輪意氣風發,恒指Call輪散晒。
有人搞住隻滙豐(005),個市有壓力,但唔適宜睇得太淡。有恒指Put輪嘅最好計數袋錢落袋,因住馬年最後1日(下周四)個市大升,去年年三十晚(2月11日),恒指就曾大升314點。
章盛